September 30, 2019

Deur Annelize Blom, stigter van die Vrouenetwerk & eienaar van Annelize Photography & Design.

Ek was maar ‘n lui student op Tegnikon en het meer klasse misgeloop as bygewoon. Maar daar was 2 vakke wat ek nie sommer gebank het nie en dit was Sielkunde en Bemarking. Dit is twee onderwerpe wat my tot vandag nog fassineer en toevallig baie sterk inmekaar geweef is wanneer dit kom by die bemarking en blootstelling van ‘n produk.

Nooit sal ek vergeet die oggend, baie jare gelede, toe ons bemarkings lektor verskeie logos van groot maatskappye vir ons op die projektor gewys het nie, elkeen sonder die handelsmerk se naam by. Hy het ons uitgedaag om te kyk hoeveel ons kan erken - slegs aan hul embleme of kleurskakerings. Daar was bv. Nike se regmerkie, BMW se sirkel (sonder die letters by), ‘n klein uitsluitsel van Coke se rooi vloeiende skrif, Shell se skulpie en vele meer. Ek was uit die veld geslaan oor hoeveel ek onmiddellik kon eien, selfs handelsmerke wat ek nie regtig so bekend mee was of noodwendig ondersteun het nie. Skielik het die lig deurgebreek en die sielkunde agter bemarking het vir my begin sin gemaak.

Dít noem jy DIE KRAG VAN KONSEKWENDHEID.

Hoe meer konsekwent jou handelsmerk (m.a.w. jou korporatiewe identiteit, waardes en strategie) hoe meer konsekwend is jou boodskap. En dit is die mees belangrikste sleutel tot die bou van vertroue, lojaliteit en herkenbaarheid by jou verbruikers.

My ondervinding in hierdie veld...

My passie is wakker gemaak tydens my studies en die uitdaging van hoe om ‘n produk op die beste moontlike manier, voor die beste moontlike teikenmark se neuse te kry en te verseker dit word raakgesien en onthou, het my hart vinniger laat klop.

Vir ongeveer 8 jaar was ek in die reklame en bemarkings-bedryf en het wonderlike ondervinding opgedoen so tussendeur die foute. In hierdie tyd het ek ‘n derde passie van myself ontdek: grafiese ontwerp. Ek het gefrustreerd geraak as ek ‘n prentjie in my kop het van hoe ‘n pamflet of advertensie moet lyk en die ontwerper kom nie die mas op nie. Na baie navorsing, oefen en ’n hele paar mislukkings, kon ek uiteindelik die prentjie in my kop self op papier vaspen. Dit was ‘n reuse oorwinning en so bevredigend dat ek gou direkte bemarking verruil het vir my rekenaar skerm, waar ek vir die laaste 10 jaar al my praktiese ondervinding kon toepas in die skep, beplanning en ontwerp van handelsmerke.

Vir enige handelsmerk is die einddoel om ‘n huishoudelike naam te raak en met elke ontwerp neem ek die volle siklus in ag om hierdie mikpunt te bereik. Vanaf die skep van die konsep, ontwerp van die korporatiewe identeit, regdeur tot die kommunikasie met potensiële verbruikers.

Die geheime bestanddeel wat lei tot dié soort bekendheid waarna ons streef, is konsekwendheid. Altyd. Elke keer. En dan weer.

WAAR OM TE BEGIN

Daar is twee belangrike vrae waarvoor jy so vinnig as moontlik antwoorde moet kry. Eerstens moet jy identifiseer wie jou teikenmark is. Wie het jou produk of diens nodig en gaan dit dus koop? Dan moet jy besluit watter tipe persoonlikheid en stemtoon die beste met hulle gaan kommunikeer. Die tweede vraag kan meer as een antwoord hê, maar dit is belangrik dat daar slegs op een besluit word.

Kom ek gee ‘n voorbeeld: As jy sport klere vir dames verkoop met ‘n teikenmark van vroue tussen die ouderdom van 18-55, gaan dit nie werk om ‘n bombastiese of ’n stywe, formele handelsmerk persoonlikheid uit te straal nie. ‘n Gemaklike stemtoon met tong-in-die-kies humor en quirky sê-goed is een moontlike benadering wat jou mark gaan bereik, of dalk ‘n meer grasieuse, ernstige fokus op die rol van vrou wees en belangrikheid van ‘n gesonde leefstyl….

Alhoewel beide goed kan werk, is die baie belangrik om een persoonlikheid te kies en dan daarby te hou – in alle kommunikasie. 

HOE KIES EK ‘N PERSOONLIKHEID EN STEMTOON?

Nog ‘n belangrike wenk wat ek geleer het tydens my studies, was om die persoonlikheid van jou produk met ‘n dier te vergelyk. Vreemde konsep, maar dit werk goed.

Is dit bv spelerig, energiek en betroubaar soos ‘n golden retriever, of weerspieël dit meer ‘n statige hings, wat formeel pronk met krag en sjarme. Dalk ‘n oulike, snoesige hasie wat jy net wil vasdruk en jou eie maak, of miskien ‘n swierige swaan, wat sag is, maar tog streng in haar waardes, beskermend en grasieus mense betower met haar skoonheid (laasgenoemde was my inspirasie vir die Vrouenetwerk se handelsmerk. Swane beweeg in groepe en is baie beskermend en lojaal teenoor hul kudde. En boonop was die vergelyking van die lelike eendjie – ons as baba entrepreneurs – wat in pragtige swane verander, vir my so mooi gepas!).

Wanneer jy die persoonlikheid - en dus stemtoon - vasgestel het, pas jy die trant toe vanaf die ontwerp van jou korporatiewe identiteit, kleure en skrif, regdeur tot elke vorm van bemar-king wat jy doen. Sou jy identifiseer met die getroue golden retriever, gaan elke ontwerp die spelerige, energieke en lojale beeld uitstraal. Dit sal erken word in jou besigheid se logo, skryfbehoeftes, bemarkingsmateriale (pamflette, plakkate, advertensies ens) en dan natuurlik ook in jou boodskap en formaat wat jy aanlyn gebruik op jou webtuiste en sosiale media kanale. Herhaling is die sleutel en dit is noodsaaklik dat dieselfde stemtoon regdeur elke kanaal gebruik en erken word.

Só skep jy ‘n aspek van bekendheid vir jou handelsmerk wat uiters waardevol is wanneer die verbruiker moet kies tussen jou en vyf ander soortgelyke produkte. ‘n Goeie wenk is om op ‘n gereelde basis weer terug te gaan na jou oorspronklike persoonlikheids analise van jou handelsmerk en seker te maak jy is steeds op koers.

Om die waardes wat jy geïdentifiseer het toe te pas in jou kliënte verhoudinge is natuurlik net so ‘n belangrike element van jou branding. As jou besigheid roem op getrouheid, geloofwaardigheid en eerlikheid is dít dan hoe jy te alle tye te werk gaan met jou kliënte, met geen uitsondering. Onthou, om foute te erken, ontbloot nie ‘n swakpunt nie, maar inteendeel bevestig dit jou deursigtigheid en egtheid.

SAMEVATTING

As jy nog nie oortuig is dat bogenoemde so ‘n groot impak kan maak nie, oordink die volgende…

Handelsmerk konsekwentheid neem jou bemarking tot die volgende vlak, waar die verbruiker nie meer oortuig hoef te word om jou produk te gebruik nie, maar as gevolg van die vertroue wat opgebou is en geloofwaardigheid gekoppel daaraan, reeds jou wil ondersteun. Dit is al menige kere bewys dat die koopproses ‘n baie meer emosionele besluit is as ‘n praktiese een.

Om op te som: deur konsekwendheid word jou handelsmerk bekend aan jou verbruikers en verbruikers vertrou produkte wat hulle herken. Maak gebruik van hierdie hulpmiddel en omskep jou handelsmerk in ’n huishoudelike naam waarmee almal vertroud is...


Leave a comment

Comments will be approved before showing up.